Post by Suralista on Jan 21, 2010 23:45:46 GMT -8
JIMPLE BORLAGDAN
Igwang mga babaying pigsasamba—na nagsasamba man sa iba. An pigsasamba ninda iba man an muya. Ining pagsamba ninda an minataong sakit sainda gabos.
Ini an makangalas na mekanismo kan kinaban; dai mo masabutan kun dapat makamateng panhinayang. Ta ini an minapanamit kan buhay; an pagngalas digdi an minapaaskad kan satong luha; an minapahewas kan banggi.
Igwang babaying bako man kagayunan, pero an pandok niyang ining dai naaagihan ki panduwang hiling an garo minapararumon saiya. Saro siyang pyanong nakahipid an dakulon na magayon na kanta sa tahaw kan mga martilyo buda kuwerdas. Instrumento siyang dai nakikiblit.
Igawang paghalat an pandok niya pagminahiling siya pasiring sa mga hararayo o harararom na mga bagay, arog kan langit o puro kan bulod sa lipod kan mga harong.
Igwa man na lalakeng naghahanap, nangangalagkalag sa mamundong kaawagan. Dai niya aram kun tatao na siya magpadaba. Pero aram niyang handa na siya magtao. Kun makua niya an saiyang hanap, an bulos kan saiyang daghan garo burabod na dai mahuhubas.
Kan nagkatuparan ining duwang kamunduan, magayon bagang isipon na sa ibang lugar may napuling na tahong, na sa pag-agi kan panahon mamuta ki perlas.
Su lalaki tulos nagpauran kan saiyang laog: mga burak, sarong dosenang puting rosas kan saiyang malinig na pagmawot, dai mabilang na paorootrong hiling kan sarong nag-aataman.
Su babayi, sa hampang kan mahamot buda malipot na paros puminiyong sa pagsapar sa siram kan pigsasamba. Dai niya aram an dapat gibuhon. Muya niyang dai na matapos an pag-atang, pero muya niya man na pumiyong sana. Sa sikreto niyang diklom, an pandok kan naglalaad na totoong pigpapadaba.
Sa daghan kan syudad, igwang harong na an pagkasuanoy arog sa pangaran kan kadsadiri, an langkaw arog sa estado kan nag-iistar digdi sa sosyodad. Sa buhos kaining atop, apat na salog hali sa daga, nakatukaw, nakatanaw sa daing laog na bangging langit an totoong padaba kan babayi.
Naghahalat siya, pero an pandok niya garo na nakahigda, nagpapahingalo sa kun sain na katrangkiluhan sa dampog. Turutadtaod, an sagyad sa lansang na hagyan kan mga paabot na bitis kan saiyang mga pag-iriba dara an alak buda aso-- pero dai siya makiling, dai matatanyog hali sa saiyang pagkatangad. Arog baga siya kaini nagigin diyos sa mata kan babaying nagpapadaba saiya, garo masiramon an saiyang pagkawara, garo makaduraton habason an saiyang pagreparo, ta garo siya bituon na pirming dai digdi, harayuon. Buda an babayi baga saro sana sa mga pag-iriba niyang pigbubugtak sa saiyang pamitsan an mga dara-darang bulong sa mga naliliptan nindang mga laman.
Arog kan dati gigibuhon nindang aga an bangging ini sa paghudong sa mga lawas nindang lanog sa pangangaipo.
Arog kan dati sa sadit na kinaban na ini sa ibabaw kan mga turog o gadan, kan mga nag-uutnga o nauutsan, kan mga naglalayog o nagkakamang, an hiling kan lalaki sa babayi, an hiling kan babayi sa nakatangad niyang padaba, minagibong trayanggulong lugad sa panahon. Tama sanang isipon na sa ibang lugar, may ayam na naghahaya sa diklom.
Pagdai sinda digdi sa atop kan harong sa daghan kan siyudad, an banggi kaining lalaking nagpapalis kan saiyang laog, buda ining babaying nakapiyong, parehong daing hungok. An mata ninda nakapuntok sa puti nindang mga kisame. Buda ano an nahihiling ninda duman? Bakong su lalawgon kan tunay nindang pigpapadaba?
Kun mahihiling ta sana an saindang imahinasyon sa kawaran, tibaad an mga kulor kaini arog kan mga kalayo kan pigmumukna pa sana an gabos.
Sa tampi kan mga bangin nakakalakaw sinda sa paros.
Pano an langit kan banggi ki ngaran na pig-aapod hali sa mga gubot na higdaan.
An mga ilaw malumlom sa dai pa nasisimbag na mga hagadon.
Siyempre hinapot na man kan lalaki, pagkatapos kan saiyang mga pamibi, bago niya ipiyong an saiyang mga mata, kun sisay daw an pig-iisip kan babayi sa mga oras na arog kaini. Pero ibang klase minasimbag an buhay sa arog kaining mga kahaputan. Naaraman niya na dai kayang gumibong perlas an napuling na tahong kan sarong buyong na maaga, sa harong na nakadungaw sa puso kan syudad, inatang kan babayi su huba niyang pagmawot sa saiyang totoong pigpapadaba. Su lalaki, sa gilid kan saiyang piyong na mata sa harayo, sa dai niya masabutan, sa nagsasaralakan na kulog, ngalas, buda supog sa sadiri, sa natatanaw na pribadong palabas, buminungkaras hali sa otik na katurog, sa sarong banig ki mga turog na luyong, pasiring sa daing laog na sala, sa sopa, kinagat su ngabil sa haldat na hali sa saiyang laog.
Dai siya nagluha, pero sa mata niyang piniyong ki higuton, pig-aarog an pagmate kan mga gadan o an kadikluman kan kahewasan kan dai pa namumukna an liwanag, napiga su gari mga bituon sa diklom kan saiyang payo.
Totoong minawot niya nang lumukso sa bintana, humugpa kuta sa sarong kinaban ki pagkalingaw. Sa bukas na bintana kun sain an bandalang ilaw kan siyudad riraw na helang, paorootro niyang hinulog an sadiri.
Su babayi man na burak na binuka na an sadiri sa pigsasambang kalayo, rinuso an sadiri sa namumutan. Pero napasa an salming na sandalyas sa pagpirit kan dai hustong bitis kan isikwal siya, ulukan, kuspaan kan pigsasamba.
Bakong kan nangyayari ini magayon isipon na sa ibang lugar, tibaad sa sarong bar na maasohon buda parong alak, may poeta buda an saiyang gitara, pig-aawit an kulog kan kinaban sa mga diwit na nabungog sa kaogmahan kan tag-init.
Dangan nangyari an sarong banggi, sa sadit na kadlagan sa mahewason na unibersidad na pig-eeskwelahan kan tulong ini. Mantang nagseselebrar an mga estudyante kan kaaldawan kan saindang eskwelahan, yaon an lalaki, an babayi, buda an padaba kaini sa irarom kan gurang na mga akasya, nakaturukaw palibot sa amak ki mga sanga buda alang na dahon.
An tugtog kan banda buda suriyaw kan mga nag-oorogmang mga tawo, pighahatod sainda kan paros kan banggi, pero dai sinda ki nadadangog. An malinaw sa saindang mga talinga iyo an saindang dai paggirom; an kawaran nindang maitataram. An lanit kan haluyon nang pagmawot na magin maogma.
Kan dai na makatios, tuminindog su padaba kan babayi, dangan nagtaram na mapasiring siya duman sa mga nag-oorogmang mga tawo, hahampangon niya na su saiyang pigpapadaba, dawa kulgan siya kaini ki pagsayuma, dawa ipasupog siya kaini, dawa maati ini saiya, sa puso niyang yaon sa salang lawas, hahampangon niya na ini ta para saiya ubos na an saiyang sisibugan, dai na siyang ibang aram na dulagan kundi ini.
Arog sa bituon na hinalon na kan liwanag kan mag-agahon, suminalak an padaba kan babayi sa mga ilaw buda tanog. Sa saiyang natutukawan maluwayon na pigrarabnot kan babayi an mga awot sa saiyang hampang, mantang nagwawagas an silyab kan kalayo sa nagdudumig niyang mata.
Nata dai pagduwahon an kulog na namamati kan lalaking nakahiling ngonian saiya? Nata dai niya saparon an pagmati kan awot na pigrurunot kan kamot kan saiyang pigpapadaba? Kun sa kada luha kaining hinibi na bako man para saiya lalo niyang nasasabutan an pagsusog kaini sa namumuotan, iyo man an padagos kaining pagrayo saiya.
Bago pa rumarom an lugad buda banggi, inagda na kan lalaki su babaying mag-uli. May balak na ini. Tibaad sa paaging ito, kumiling saiya su babayi.
Lunad sa taksing pig-uumbasan an pag-abot kan mag-agahon, nagtugot su babayi dawa sain siya darahon. Pareho sinda warang taramon; sa bukas na bintana kan lunadan piyong pareho an saindang mga mata sa malipot na maagang paros kan syudad, buda sa banaag kan mga ilaw buda neon.
Sa piot na kwartong pig-aarkila kan lalaki, sa higdaan niyang maharaphap sa alpog sa bihira niyang paghigda digdi, ihinigda niya su babayi.
Sa diklom kan piyong kan babayi na habo nang imuklat, namati niya an pagpasyar kan ngabil kan lalaki sa saiyang pandok. Kan nakaantos ini sa saiyang ngimot, sinabat niya ini kan buka niyang hadok, sa diklom nahihiling niya su mga dumog buda maating dalan na saindang niralaog pasiring sa lugar na ini. Naisip niya man su yumok kan marmol sa harong kan saiyang pigpapadaba. Naisip niya, buda, mantang naiisip niya ini, minahigot an saiyang kugos sa lalaki, su bangging inatang niya su saiyang sadiri sa saiyang padaba, na dawa nananamitan niya an digwa sa ngimot kaini, na dawa luyuson na ini sa alak na ngana, itinamong niya an saiyang sadiri sa gadan kaning lawas. Pero naisip niya man, buda namamati ngonian an duon na nakapurupot sa saiyang lawas. Duon na luway-luway pigrurunot an saiyang kaluyahan. Yaon siya sa tampi kan baybayon, pig-iisip kun rusuon niya an lawod na pigbubukag kan darakulaon na hukol. Ta an kamot kan lalaki tubig na nagdadaruydoy sa korte kan saiyang lawas, garo siya dugi na pighuhurma kan sarong para-masetera, pigpaparumdom saiya an rarom buda tukadon kan saiyang porma.
Nahihiling kan lalaki an sadiring nagkakamang hali sa hararumon na kalot pasiring sa liwanag na garo sana mata ki dagom. Haluyon na siya sa diklom, nata dai niya hidaleon an pagsampot sa dawa pasaring na liwanag?
Ugaring kan nasampot niya an puon kan biruli kan pantalon kan babayi, bigla ining muminuklat, buda sa hiling saiya kaini, manggad nang punduhon an dawa anong isog kan dagat. Ruminasay su lalaki sa abaga kan babayi, pighahangos su parong kan liog kaini, naghahagad na dispensa.
Sa luwas, naggigios na an siyudad. Sa maalpog na kama nakahigda sana sinda duman, nakahiling sa kisame. Ano an pighihiling mo, sabi kan babayi.
Kan nagi-ulok su lalaki, hinapot siya kan babayi kun nata. Dai ako tuod na mahiling ka sa arog kaini, ta sa kwartong ini, buda sa dakol pang iba, pirmi kang yaon, digdi, diyan, tinuro niya su kisame. Kun sa pagbukod mo saiya, sabi kan lalaki, kun pwede sanang kumiling ka sa likodan mo.
Su ulok kan babayi garo kukong kinaros sa lata, bago ini nagsabing, sisay man an muyang madipisilan?
Sa sadit na kwarto, mantang naglalaog sa mga pawang kan lawanit su mga enot na sildang kan aldaw, nagluwas sindang duwa. Magayunon na aldaw. Sa bulawan na sildang, na minatama sa saindang pig-aagihan, nakakuang gayon su babayi sa murit buda waerak kan mga dalan. Diiton pa sana an mata, mala digdi, garo sinda su enot na lalaki buda babaying naglakaw sa paraiso. Tinao kan babayi su saiyang kamot, buda naglakaw sinda digdi sa piot na kinaban, na sa dakol na banggi nindang pagsakat sa harong sa puso kan siyudad, sainda sanang pigdudukuan.
Sa saindang duwa, may kudal na narumpag; sa kun sain an duwang kadlagan na nasuway sa pag-inutan na makapano ki kaawagan sa hudyan nagtagbuan pagkatapos mapano ki rambong an kinaban. Dawa aram kan babayi na masusog man giraray siya sa tunay niyang pigpapadaba sagkod sa raoton siya kaini, runuton ki paoro-otro, ipanao sa mga punaw—pagmati niya hararayuon pa an bagay na ini. Muya niya sana munang namiton su gayon kan aga.
Arog man kaini su lalaki, para saiya, ini na muna, dawa aram niya an mamamatean na pait kan mag-abuton na mga banggi—pano niya pa hahampangon an kwarto, pano niya pa hihigdaan an kamang nungka nang magigin arog kan dati—basta sa agang ini, sa hampang kan kinaban, natutubong niya an kamot kan saiyang padaba. An pag-ako sa laog niya, iyo na kusog na isarado an bintana dawa nakasirip an haloy nang pig-mamawot na mahiling na bituon.
An kada lakad niya parani sa uulian kan babayi, iyo man an lakad niya parayo sa talimon kan nagbuburukadan na mga kamunduan na garo kaipuhan na dai dapat na kasagkodan.
Igwang mga babaying pigsasamba—na nagsasamba man sa iba. An pigsasamba ninda iba man an muya. Ining pagsamba ninda an minataong sakit sainda gabos.
Ini an makangalas na mekanismo kan kinaban; dai mo masabutan kun dapat makamateng panhinayang. Ta ini an minapanamit kan buhay; an pagngalas digdi an minapaaskad kan satong luha; an minapahewas kan banggi.
Igwang babaying bako man kagayunan, pero an pandok niyang ining dai naaagihan ki panduwang hiling an garo minapararumon saiya. Saro siyang pyanong nakahipid an dakulon na magayon na kanta sa tahaw kan mga martilyo buda kuwerdas. Instrumento siyang dai nakikiblit.
Igawang paghalat an pandok niya pagminahiling siya pasiring sa mga hararayo o harararom na mga bagay, arog kan langit o puro kan bulod sa lipod kan mga harong.
Igwa man na lalakeng naghahanap, nangangalagkalag sa mamundong kaawagan. Dai niya aram kun tatao na siya magpadaba. Pero aram niyang handa na siya magtao. Kun makua niya an saiyang hanap, an bulos kan saiyang daghan garo burabod na dai mahuhubas.
Kan nagkatuparan ining duwang kamunduan, magayon bagang isipon na sa ibang lugar may napuling na tahong, na sa pag-agi kan panahon mamuta ki perlas.
Su lalaki tulos nagpauran kan saiyang laog: mga burak, sarong dosenang puting rosas kan saiyang malinig na pagmawot, dai mabilang na paorootrong hiling kan sarong nag-aataman.
Su babayi, sa hampang kan mahamot buda malipot na paros puminiyong sa pagsapar sa siram kan pigsasamba. Dai niya aram an dapat gibuhon. Muya niyang dai na matapos an pag-atang, pero muya niya man na pumiyong sana. Sa sikreto niyang diklom, an pandok kan naglalaad na totoong pigpapadaba.
Sa daghan kan syudad, igwang harong na an pagkasuanoy arog sa pangaran kan kadsadiri, an langkaw arog sa estado kan nag-iistar digdi sa sosyodad. Sa buhos kaining atop, apat na salog hali sa daga, nakatukaw, nakatanaw sa daing laog na bangging langit an totoong padaba kan babayi.
Naghahalat siya, pero an pandok niya garo na nakahigda, nagpapahingalo sa kun sain na katrangkiluhan sa dampog. Turutadtaod, an sagyad sa lansang na hagyan kan mga paabot na bitis kan saiyang mga pag-iriba dara an alak buda aso-- pero dai siya makiling, dai matatanyog hali sa saiyang pagkatangad. Arog baga siya kaini nagigin diyos sa mata kan babaying nagpapadaba saiya, garo masiramon an saiyang pagkawara, garo makaduraton habason an saiyang pagreparo, ta garo siya bituon na pirming dai digdi, harayuon. Buda an babayi baga saro sana sa mga pag-iriba niyang pigbubugtak sa saiyang pamitsan an mga dara-darang bulong sa mga naliliptan nindang mga laman.
Arog kan dati gigibuhon nindang aga an bangging ini sa paghudong sa mga lawas nindang lanog sa pangangaipo.
Arog kan dati sa sadit na kinaban na ini sa ibabaw kan mga turog o gadan, kan mga nag-uutnga o nauutsan, kan mga naglalayog o nagkakamang, an hiling kan lalaki sa babayi, an hiling kan babayi sa nakatangad niyang padaba, minagibong trayanggulong lugad sa panahon. Tama sanang isipon na sa ibang lugar, may ayam na naghahaya sa diklom.
Pagdai sinda digdi sa atop kan harong sa daghan kan siyudad, an banggi kaining lalaking nagpapalis kan saiyang laog, buda ining babaying nakapiyong, parehong daing hungok. An mata ninda nakapuntok sa puti nindang mga kisame. Buda ano an nahihiling ninda duman? Bakong su lalawgon kan tunay nindang pigpapadaba?
Kun mahihiling ta sana an saindang imahinasyon sa kawaran, tibaad an mga kulor kaini arog kan mga kalayo kan pigmumukna pa sana an gabos.
Sa tampi kan mga bangin nakakalakaw sinda sa paros.
Pano an langit kan banggi ki ngaran na pig-aapod hali sa mga gubot na higdaan.
An mga ilaw malumlom sa dai pa nasisimbag na mga hagadon.
Siyempre hinapot na man kan lalaki, pagkatapos kan saiyang mga pamibi, bago niya ipiyong an saiyang mga mata, kun sisay daw an pig-iisip kan babayi sa mga oras na arog kaini. Pero ibang klase minasimbag an buhay sa arog kaining mga kahaputan. Naaraman niya na dai kayang gumibong perlas an napuling na tahong kan sarong buyong na maaga, sa harong na nakadungaw sa puso kan syudad, inatang kan babayi su huba niyang pagmawot sa saiyang totoong pigpapadaba. Su lalaki, sa gilid kan saiyang piyong na mata sa harayo, sa dai niya masabutan, sa nagsasaralakan na kulog, ngalas, buda supog sa sadiri, sa natatanaw na pribadong palabas, buminungkaras hali sa otik na katurog, sa sarong banig ki mga turog na luyong, pasiring sa daing laog na sala, sa sopa, kinagat su ngabil sa haldat na hali sa saiyang laog.
Dai siya nagluha, pero sa mata niyang piniyong ki higuton, pig-aarog an pagmate kan mga gadan o an kadikluman kan kahewasan kan dai pa namumukna an liwanag, napiga su gari mga bituon sa diklom kan saiyang payo.
Totoong minawot niya nang lumukso sa bintana, humugpa kuta sa sarong kinaban ki pagkalingaw. Sa bukas na bintana kun sain an bandalang ilaw kan siyudad riraw na helang, paorootro niyang hinulog an sadiri.
Su babayi man na burak na binuka na an sadiri sa pigsasambang kalayo, rinuso an sadiri sa namumutan. Pero napasa an salming na sandalyas sa pagpirit kan dai hustong bitis kan isikwal siya, ulukan, kuspaan kan pigsasamba.
Bakong kan nangyayari ini magayon isipon na sa ibang lugar, tibaad sa sarong bar na maasohon buda parong alak, may poeta buda an saiyang gitara, pig-aawit an kulog kan kinaban sa mga diwit na nabungog sa kaogmahan kan tag-init.
Dangan nangyari an sarong banggi, sa sadit na kadlagan sa mahewason na unibersidad na pig-eeskwelahan kan tulong ini. Mantang nagseselebrar an mga estudyante kan kaaldawan kan saindang eskwelahan, yaon an lalaki, an babayi, buda an padaba kaini sa irarom kan gurang na mga akasya, nakaturukaw palibot sa amak ki mga sanga buda alang na dahon.
An tugtog kan banda buda suriyaw kan mga nag-oorogmang mga tawo, pighahatod sainda kan paros kan banggi, pero dai sinda ki nadadangog. An malinaw sa saindang mga talinga iyo an saindang dai paggirom; an kawaran nindang maitataram. An lanit kan haluyon nang pagmawot na magin maogma.
Kan dai na makatios, tuminindog su padaba kan babayi, dangan nagtaram na mapasiring siya duman sa mga nag-oorogmang mga tawo, hahampangon niya na su saiyang pigpapadaba, dawa kulgan siya kaini ki pagsayuma, dawa ipasupog siya kaini, dawa maati ini saiya, sa puso niyang yaon sa salang lawas, hahampangon niya na ini ta para saiya ubos na an saiyang sisibugan, dai na siyang ibang aram na dulagan kundi ini.
Arog sa bituon na hinalon na kan liwanag kan mag-agahon, suminalak an padaba kan babayi sa mga ilaw buda tanog. Sa saiyang natutukawan maluwayon na pigrarabnot kan babayi an mga awot sa saiyang hampang, mantang nagwawagas an silyab kan kalayo sa nagdudumig niyang mata.
Nata dai pagduwahon an kulog na namamati kan lalaking nakahiling ngonian saiya? Nata dai niya saparon an pagmati kan awot na pigrurunot kan kamot kan saiyang pigpapadaba? Kun sa kada luha kaining hinibi na bako man para saiya lalo niyang nasasabutan an pagsusog kaini sa namumuotan, iyo man an padagos kaining pagrayo saiya.
Bago pa rumarom an lugad buda banggi, inagda na kan lalaki su babaying mag-uli. May balak na ini. Tibaad sa paaging ito, kumiling saiya su babayi.
Lunad sa taksing pig-uumbasan an pag-abot kan mag-agahon, nagtugot su babayi dawa sain siya darahon. Pareho sinda warang taramon; sa bukas na bintana kan lunadan piyong pareho an saindang mga mata sa malipot na maagang paros kan syudad, buda sa banaag kan mga ilaw buda neon.
Sa piot na kwartong pig-aarkila kan lalaki, sa higdaan niyang maharaphap sa alpog sa bihira niyang paghigda digdi, ihinigda niya su babayi.
Sa diklom kan piyong kan babayi na habo nang imuklat, namati niya an pagpasyar kan ngabil kan lalaki sa saiyang pandok. Kan nakaantos ini sa saiyang ngimot, sinabat niya ini kan buka niyang hadok, sa diklom nahihiling niya su mga dumog buda maating dalan na saindang niralaog pasiring sa lugar na ini. Naisip niya man su yumok kan marmol sa harong kan saiyang pigpapadaba. Naisip niya, buda, mantang naiisip niya ini, minahigot an saiyang kugos sa lalaki, su bangging inatang niya su saiyang sadiri sa saiyang padaba, na dawa nananamitan niya an digwa sa ngimot kaini, na dawa luyuson na ini sa alak na ngana, itinamong niya an saiyang sadiri sa gadan kaning lawas. Pero naisip niya man, buda namamati ngonian an duon na nakapurupot sa saiyang lawas. Duon na luway-luway pigrurunot an saiyang kaluyahan. Yaon siya sa tampi kan baybayon, pig-iisip kun rusuon niya an lawod na pigbubukag kan darakulaon na hukol. Ta an kamot kan lalaki tubig na nagdadaruydoy sa korte kan saiyang lawas, garo siya dugi na pighuhurma kan sarong para-masetera, pigpaparumdom saiya an rarom buda tukadon kan saiyang porma.
Nahihiling kan lalaki an sadiring nagkakamang hali sa hararumon na kalot pasiring sa liwanag na garo sana mata ki dagom. Haluyon na siya sa diklom, nata dai niya hidaleon an pagsampot sa dawa pasaring na liwanag?
Ugaring kan nasampot niya an puon kan biruli kan pantalon kan babayi, bigla ining muminuklat, buda sa hiling saiya kaini, manggad nang punduhon an dawa anong isog kan dagat. Ruminasay su lalaki sa abaga kan babayi, pighahangos su parong kan liog kaini, naghahagad na dispensa.
Sa luwas, naggigios na an siyudad. Sa maalpog na kama nakahigda sana sinda duman, nakahiling sa kisame. Ano an pighihiling mo, sabi kan babayi.
Kan nagi-ulok su lalaki, hinapot siya kan babayi kun nata. Dai ako tuod na mahiling ka sa arog kaini, ta sa kwartong ini, buda sa dakol pang iba, pirmi kang yaon, digdi, diyan, tinuro niya su kisame. Kun sa pagbukod mo saiya, sabi kan lalaki, kun pwede sanang kumiling ka sa likodan mo.
Su ulok kan babayi garo kukong kinaros sa lata, bago ini nagsabing, sisay man an muyang madipisilan?
Sa sadit na kwarto, mantang naglalaog sa mga pawang kan lawanit su mga enot na sildang kan aldaw, nagluwas sindang duwa. Magayunon na aldaw. Sa bulawan na sildang, na minatama sa saindang pig-aagihan, nakakuang gayon su babayi sa murit buda waerak kan mga dalan. Diiton pa sana an mata, mala digdi, garo sinda su enot na lalaki buda babaying naglakaw sa paraiso. Tinao kan babayi su saiyang kamot, buda naglakaw sinda digdi sa piot na kinaban, na sa dakol na banggi nindang pagsakat sa harong sa puso kan siyudad, sainda sanang pigdudukuan.
Sa saindang duwa, may kudal na narumpag; sa kun sain an duwang kadlagan na nasuway sa pag-inutan na makapano ki kaawagan sa hudyan nagtagbuan pagkatapos mapano ki rambong an kinaban. Dawa aram kan babayi na masusog man giraray siya sa tunay niyang pigpapadaba sagkod sa raoton siya kaini, runuton ki paoro-otro, ipanao sa mga punaw—pagmati niya hararayuon pa an bagay na ini. Muya niya sana munang namiton su gayon kan aga.
Arog man kaini su lalaki, para saiya, ini na muna, dawa aram niya an mamamatean na pait kan mag-abuton na mga banggi—pano niya pa hahampangon an kwarto, pano niya pa hihigdaan an kamang nungka nang magigin arog kan dati—basta sa agang ini, sa hampang kan kinaban, natutubong niya an kamot kan saiyang padaba. An pag-ako sa laog niya, iyo na kusog na isarado an bintana dawa nakasirip an haloy nang pig-mamawot na mahiling na bituon.
An kada lakad niya parani sa uulian kan babayi, iyo man an lakad niya parayo sa talimon kan nagbuburukadan na mga kamunduan na garo kaipuhan na dai dapat na kasagkodan.